اورميه نين اسكي تپه سي: گؤي تپه

اورميه ايرانين آذربايجان بؤلگه سينين اسكي و تاريخي شهرلريندن ساييلير. بو شهرين قيراغيندا اولان چوخلوجا تاريخي آبيده لر و اسكي لي تپه لر (آلتي مين ايلليك) بو سؤزو قبول ائتديرير. گؤي تپه اورميه نين قوزئي دوغوسونون 6 كيلومئترلييينده يئر توتوبدور.

گؤي تپه اورمونون اسكي تپه لرينين ان آدليملاريندان ، زنگين ايزلرلره دولودور و آذربايجانين فخر ائديجي ايلايينين(تاريخينين) گؤسته ريجيسيدير. 1948نجي دوغوش (ميلادي) ايلينين قازينتيلاريندان اؤنجه اينگيليس ليلر بو اسكي لي بؤلگه ده 1313 نجو گونش(شمسي) ايلينده بير لؤوحه اوستونده ناخيشلي قيلقميش شكيلين اله گتيرديلر. بو بؤلگه دن اسكي تانريلارلا ناخشيلي اولان استوانه لرده تاپيليبدير.

«بورتون براون» اينگيليسلي قازينتيجيلارين باشچيسي اؤز آراشديرمالاريني «آذربايجان قازينتيلاري» آدلي عونوانلا 1948 و 1951 ايلينده لندن ده يايينلاميش و آذربايجان و گؤي تپه تمددونون بئله ايضاح ائديب دير:

" گؤي تپه نين يئددي قاتي (طبقه سي) واردير، بو قاتلارين ان اسكي سي  د.ق(دوغوشدان قاباق) 4نجو مين ايللييه(6 مين ايل بوندان اؤنجه يه) قاييدير.بو قاتدا چين-چين ائولر،قيرميزي ساخسي قطعه لر وناخيشسيز بوز ساخسيلار، آچيق ساري بويادا ساده هندسه خطلرله-قهوه رنگينده-، ميس و داشدان اولان آراجلار واردير.

آلتينجي قات: دوغوش دان (ميلاددان) اؤنجه اوچونجو مين ايلليكدن، دوغوشدان اؤنجه  بيرينجي مين ايللييه دك قاييدير. داشلي خيم لي(فنداسيون) و پالچيق دان اولان آبيده لر، كوره ده بيشميش و ايكي بويالي و ناخيشلي ساخسيلار قهوه رنگلي و قيرميزي – قارا بويالي مركب هندسه ناخيشلارلا – قطعه لر بو قاتداندير. بو قات دا ميسدن اولان آراجلار  بوللوقجا گؤرونور.بو تمددون داش دئورينه و دوغو آنادولونون ميسي نه و آرازين قوزئيينده كي آذربايجان لا ان چوخ باغليليغي واردير.

بئشينجي قات: بو قاتين ساخسيلاري بوز ، گاهدان قارا و هاميسالليقلا(عموما) سورتولموشدورلر(صيقل وئريلميشدير).بورادان قاباريقلي (برجسته) ناخيشلارلا اولان ساخسي تاپيليبدبر، بو ساخسي آنادولو و آرازين قوزئيينده كي آذربايجان تمددونلارينا بنزري چوخدور.

دؤردونجو قات : قارا بويادا و سورتولو و ناخيشسيز اولان ساخسيلار واردير.

اوچونجو قات: بورادا بيرينجي اينسانلارين قبيرلري و آذربايجانليلارين آتا- بابالارينين جومجومه لري واردير، بو قبيرلردن تاپيلان ساخسيدان اولان قطعه لر قيرميزي بويادا و بعضي لري ايسه الوان سيز ناخيشلاري و بئشينجي قاتين ساخسيلارينا اوخشاري واردير.

ايكينجي قات: دوغوشدان اؤنجه 1200 و 1500 ايللرينه قاييدير،سورتولو(صيقلي) قارا و بوز بويادا  ناخيشسيز ساخسيلارلا دولودور.بونلار آنادولونون هيتيت ساخسيلارينا اوخشايير.

بيرينجي قات: بو قاتدا قيرميزي و بوز بويالاريندا سورتولموش ساخسيدان اولان قاب – قاجاقلار واردير.بونلارين اوستونده حئيوانلار دسته لرينده شكيللر چكيليبدير. بو قاب - قاجاقلار حسنلي تپه سينده تاپيلان قاب - قاجاقلارا بنزه ييرلر. گؤي تپه نين اوستونده يونولموش داشلار دا واردير.بو  يونولمو داشلاردا ، حئيوان ناخشلاري (اؤرنك اوچون قوچ و قافلان) واردير.بونلار دوغوشدان قاباق ايكينجي مين ايللييين سونلارينا و بيرينجي مين ايللييين ايلك لريندنديرلر.بو داشلار آنادولونون اسكي لي يونولموش هيتيت داشلارينا بنزري چوخدور."

حاضيرلايان: تورك اغلو علي آقا واحد

قايناقلار:

اورميه آدليملاري(نام آوران اورميه) 24-نجو ص

اورميه دارلنشاطينين تاريخچه سي (تاريخچه دارالنشاط اورميه) 24-نجو ص